Барлығы Польшада шешіледі

УЕФА Чемпиондар лигасының 1/8 финалы аясында өткен «Семей» мен «Пьяст» арасындағы кездесу тең аяқталды.

Семей қаласындағы тарихи алғашқы УЕФА Чемпиондар лигасы ойыны жоғары деңгейде ұйымдастырылып, жергілікті команда польшалық «Пьяст» футзал клубын қабылдады.

Матч Еуропа додасының атмосферасын төрешінің алғашқы ысқырығынан-ақ сездірді. Алаң иелері «Семей» алғашқы минуттардан бастап белсенді ойнап, бірнеше қауіпті шабуылдың бірін сәтті аяқтады. Ойынның 4-минутында шабуылшы Дедезиньо есепті ашып, жанкүйерлерді қуантты. Қарсылас команда да шабуылдарымен жауап қатқанымен, бірінші таймның нүктесін «Семей» қойды. Үзіліске командалар «Семей» 1:0 «Пьяст» есебімен кетті.

Екінші тайм голдарға толы кезең болды. Тайм бастала сала Камиль Герейханов есепті еселеп, «Семейді» жеңіске жақындатты. 2:0 есебінен кейін қонақтар шабуылды күшейтіп, ойын қарқынын өз қолдарына алды. Алайда олардың кезекті алға ұмтылған сәтінде «Семей» жылдам қарсы шабуыл ұйымдастырып, ойынның 34-минутында Дедезиньо дубль авторы атанып, таблодағы есепті ірі көрсеткішке жеткізді – 3:0.

Бірақ «Пьяст» үш жауапсыз доптан кейін ойынға жылдам оралды. Дедезиньоның голынан соң Тейшейра бір минут ішінде екі гол соғып, есепті қысқартты. 35 және 36-минуттар – 3:2.

Ойынның соңғы секундтарында «Семей» жеңісті уысынан шығарып алды. Польшалықтар сапында шешуші голды Мартинес соғып, матчты тең есепке жеткізді – 3:3.

Жауапты кездесу Польшада, Гливице қаласында 5 желтоқсанда өтеді.