«Семей» УЕФА футзал Чемпиондар лигасына жолдама алды

Футзалдан «Семей» клубы 2024/25 маусымының жартылай финалдық сериясындағы үшінші ойында сырт алаңда «Ақтөбені» сенімді түрде жеңіп, финалға мерзімінен бұрын жолдама алды. Кездесу 2:6 есебімен біздің командамыздың пайдасына аяқталды. Бұл жеңіс сериядағы есепті 3:0-ге жеткізді.

Ойын барысында біздің команданың атынан гол соққандар: Чингиз Есенаманов (7-минут), Никита Емельянов (15’), Андерсон Дедезиньо (22’), Камиль Герейханов (25’), Ақжол Дарибай (40’). Сондай-ақ 35-минутта қарсылас өз қақпасына автогол соғып берді. «Ақтөбе» сапында Асхат Күлбаев дубльмен көзге түсті (6’ және 13’ минуттар).

Айта кетейік, серияның алғашқы ойынында «Семей» қосымша уақытта 4:2 есебімен жеңсе, екінші ойында 8:1 есебімен айқын басымдықпен жеңіске жеткен болатын.

Осылайша, өзінің екінші маусымында-ақ «Семей» тағы да Қазақстан чемпионатының финалына шығып, 2025/26 маусымында УЕФА футзал Чемпиондар лигасында ел намысын қорғауға мүмкіндік алды.

Финалдық серия үш жеңіске дейін өтеді. Алғашқы екі ойын 23 және 24 маусым күндері «Семейдегі» «Абай Аренада» өтеді. Кейін командалар сырт алаңда 27 және 28 маусым күндері кездеседі. Егер бесінші шешуші ойын қажет болса, ол да «Семейде» өтеді, өйткені біздің команда тұрақты чемпионатта ең көп ұпай жинап, турнирлік кестеде бірінші орынды иеленді.

Финалдағы қарсылас «Атырау» мен Алматының «Қайрат» клубтарының сериясынан кейін анықталады. Бұл серияның төртінші кездесуі бүгін «Атырауда» өтеді. Егер есеп 2:2-ге теңелсе, шешуші бесінші ойын Алматыда өтеді.

Футзалдан «Семей» клубы маусым бойы жанкүйерлердің ыстық қолдауы үшін алғыс айтып, команда мүшелерін финалға шығуымен құттықтайды!