Азамат Төлеш: «Маған сенім артқандары үшін ризамын»

Қазақстан кубогындағы алғашқы ойынында «Семей» футзал клубының жас ойыншысы Азамат Төлеш дебют жасады. Кездесуден кейін ол әсерімен бөлісті.

– Азамат, дебюттік ойын туралы не айтасыз?

– Ең алдымен маған сенім білдірген бапкерлер құрамына алғыс айтқым келеді. Әсіресе бас бапкер Аслам Смақовқа қолдауы үшін рақмет. Алаңға шығу – үлкен тәжірибе болды.

– Команда ішінде қолдау болды ма?

– Әрине, болды. Үлкен ойыншылар көмектесті, капитан да үнемі қолдап отырды. Соның арқасында өзімді сенімдірек сезіндім.

– Алдағы мақсаттарыңыз қандай?

– Бұл тек бастамасы. Жақсы ойнау үшін әлі көп еңбек етуім керек. Күн сайын жұмыс істеуге дайынмын.

– Жанкүйерлерге айтар сөзіңіз?

– Әрқашан қолдау көрсетіп отырған жанкүйерлерге рақмет. Сондай-ақ отбасым да әрдайым демеу береді. Сол сенімді ақтау үшін тырысамын.